Ne eshinikatet atusseun Mine Arnaud, tshika nutashinenanu anite, ne ashini ka ishinikatakanit apatite tshika nanatuaukaikanu anite pessish Uashat. Ne atusseun etutakanit nakatuapatakanu ne assi kie auenitshenat epiht anite pessish mak kanapua nashatakanu neme tshekuan ua apashtakanit anutshish kie eka pikunakannit aishinnuat kie uinuau tshe itapashtaht nete aishkat.

Nishtunnuepipuna tshipa ishpish atussenanu kie ne atusseun tshe takuak ui tutakanu tshetshi minu-pitutepanit shuniau anite tshitassinat. Tshipa shuniatshenanu kie tshipa mishau atusseun ute pet Uashat mak anite Uepishtikueiau-assit. Peikutshishemitashumitannu auenitshenat tshipa atusseuat mekuat tshimatakaniti (nishtunnuepishimua) mak tshika tshi atusseuat nishtumitashumitannu auenitshenat meshekut etananut kie anite upime tshika katshitaukuat neumitashumitannu ashu nishunnu ashu patetat. Tshipa minupuat anitshenat tshe atusseht kie tshipa minu-tshishikuakanuat anite netuapatakannit ashininu apatite, aiat nanitam netuenitakanit ne ashini.

Neme tshe ishinakuak kie tshe ishi-takuak anite atusseunit

Neme ashini tshe utaikanit anite ut assit tshika pitshishkaikanu kie ekute anite mitshima ka nutashinenanut tshe aitutakanit tshetshi takuak anite e shutshishimakak ashini tshe minuat tshetshi apashtakanit anite ka patshitinananut. Mamu nutim tshika munaikanu anu 1,3 neminiun tatutipapekaikan ashini apatite tshetshi apashtakanit anite petshitinananuti tshetshi minu-nitautshik tshekuan ka nitautshitakanit.

Peikuau tshi utaikaniti anite ut assit ne ashini ka ishinikatet apatite tshika tshitutitakanu anite mishta-utapanit tshetshi ishitapenanut anite tshe pitshishkaikanit minuat tshe itutitakanit anite tshe kanuenitakanit nasht e minu-akunaikanit eshk^u eka itutitakanit nete atusseutshuapit tshe aitutakanit tshetshi etatu shutshishimakak.

Neme tshatshipananut e aitutakanit ashini, pitshishkaikanu ekue tipanapanit anite tshekuan tekuak ashinit. Katshi tutakaniti ekue itsheuenakanit neme eshinikatet magnétite titanifère anite ka takuak ashinit ka pitshishkaikanit. Eshk^u eka mamu anite akutitakanit anite kutaka tshekuana tekuaki, neni ka utshipaniti anite nushkuat, pimit mak anite shiutakanit apashtakanua tshetshi ussit anite akutik ne ka ishinikatet apatite.

Neme ushkat tshekuan uenuipanit tshishpakau, shikuashkupanitakanu mak pashakanu nasht ekue ishinakuak kie itenitakuak miam nekau ka mishta-pishipanishit. Tshika ishitapenanu anite tshe kanuenitakanit kie akunaikanu patush minuat tshe pushtakanit anite ishkuteutapanit tshetshi ishitapenanut nete tshe kanuenitakanit Pointe-Noire, anite tekuannit utashtashun Mine Arnaud. Ek^u mashten, nishuau kie ma nishtuau peikupishimua, neme ka utaikanit ashinit apatite ka ishinikatet itautakanu ishkuteutit nete utatusseutshuapit Yara International nete Norvège.

Tan eshi-takuak tshekuan anite atusseunit

• Tshika mishi-pakuneiau anite assit, tshipa ishpishau 800 m e anakashkat kie nete eshkuat 3,7 km mak eshpishipakuneiat 240 m. ;

• anite tshe pitshishkaikanit ashini mak atusseutshuap tshe aitutakanit ne ashini;

• anite tshe ashtakaniti neni tshekuana eka menuati anite uetshipaniti ashinit;

• anite tshe mautakanit ne ashini eka menuat, anite tshe takuak assi ka itsheuenakanit eshk^u eka tshitshue katshitaikanit neme ashini ua utinakanit mak ne tshe tutakanit tshipa ishi-tshipashkuaikanu assi anite itetshe akua-nutin tshe pakuneiat ;

• peik^u anite tshe mautshitakanit ne eka ka minuat tshekuan, kutuasht-tatuau tshika katipanakanu tshetshi minushtakanit aiashkau tshi aitatussenanuti;

• tshika takuan anite nipi tshe aitutakanit tshetshi naikakanit;

• anite tshe akuanashunanut kie tshe pushtashunanut ishkuteutapan-meshkanat;

• anite tshe tatakanit neme ashini ka minuat, ka ishitapenanut kie pushtashunanuti nete pakupeutshikanit Uashat.

 

Tan tshe aitatusseshtakanit ne atusseun